⌂ 119. |17v| Frater Bartholomeus de nobilibus de Vallechia, sed etiam plus virtutibus generosus. Clericus intelligens et studiosus, predicator valens et copiosus. Religiose fuit vite et cer<i>moniosus, numquam extra refectorium comedebat, a choro non deficiebat tam de die quam de nocte, et in omnibus horis. Orationis sedule contemplatione plurimum elevatus, sensatus et cordatus homo. Bis prior nostri conventus, rexit provide, legit habunde. Post indesinentia bona opera, vallatus caterva virtutum coniunctus est agminibus angelorum 1318 de mense iunii.

120. Frater de Rivoalto vallis Here Iohannes, consanguineus fratris Iordanis. Homo fuit dotatus, scriptor venustus et velox, cantor doctus et placens. Primam missam in aurora omni mane dicebat. Sotius fuit magistri ordinis et plurium provincialium. Et cum diu in hac miseria rivulum potasset gratiarum, factus est in eo fons aque salientis in vitam eternam.

■ scriptor  = copista professionale.

121. Frater Matheus, conversus, de Asciano. Cum renuntiasset uxori ducende et aliis mundi pompis, novitius animam Deo dedit perpetuo consolandam.

122. Frater Fredericus Sardus. Optimus homo et licteratus, supprior pis(anus). Tandem exaltatus fuit ad cathedralem ecclesiam Sancte Iuste in Sardinia iuxta Arestanum, ubi digne infula episcopali potitus inter viros celicola adunatur [1318].

123. Frater Iohannes de Scorno. Villa fuit in Pisis, attamen ipse civis non solum in terrena civitate sed potius in libera Ierusalem possessor eternus.

124. |18r| Frater Raynerius Maturus, a familia sua sic dictus et vere maturus in omni morali et spirituali virtute. Ordinis disciplinam indefectibiliter observabat, fervebat çelo, procurabat pro conventu sollicite, aprobatus ab ordine multum. Expletis sine crimine in sancta religione sexaginta annis et octo, fructus maturitate suavissimos colligit felicitatis eterne. 1318.

■ 1318: qui e di seguito l'anno di morte (stile pisano) è spesso scritto al margine, sintatticamente assoluto.

125. Frater Iohannes Mascha. Nobilis erat domus, totus pius et simplex in tantum quod erat fratribus omnibus solatium ipsius simplicissima vita. Hic vidit eternos dies quinquaginta octo annis in ordine consumatis. 1318.

126. Frater Thomas de Sciortis. Hii fuerunt in Pisis ditissimi mercatores, fecerunt pingi capitulum nostrum. Iste frater fuit valde devotus et utilis, secularibus valde gratus confessor et cantor, et literis non privatus. Vixit in ordine triginta annis et postea eternaliter requievit. 1320.

127. Frater Iacobus Sostegni, conversus. Diligentissimus infirmorum servitor et humilis. Diu vixit ut eternam mortem vitaret in seculo sempiterno.

128. Frater Bernardinus, conversus, bonus et utilis, in sardorum insula migravit ad Christum.

129. Frater Gaddus, de famosis conventus nostri conversis. Nocte orationibus insistebat, die impendebat procurationi conventus, sacrista peroptimus, in seculo aurifex fuerat. Vixit in ordine xxx annis cum maxima laude, sed maiori ymo infinita exultat in celis.

130. |18v| Frater Marinus de Cascina. Cum esset valde religiosus, suavis et planus, sex vicibus supprior fuit in Pisis. Pater pius et dulcis et sequens comunia sine omni defectu. Prior Serçane et in Sardinea bis; ubi deficiente mortali et brevi vita, potitur eterna de mense februarii. 1322.

131. Frater Gregorius de Vico. Verissimus Dei servus, sensatus et prudens, discretione modestus, çelabat ardentissime pro ordinis et conventus augmento, unde magister novitiorum fuit pluries et multorum, inter quos et ego vidi quamplures qui fuerunt discipuli eius; quibus non solum doctrinam sanctitatis et vite perfecte ministrabat sed etiam temporalia procurabat. Hic cum in agro dominico diutius laborasset, collectus ad patres in vera pace quievit.

132. Frater Gaddus de Sancto Frediano. Fuit frater plurimum studiosus, semoccinator [sic] gratus in latino pariter et vulgari, cantor doctus et expertus. De mense iulii fuit superius elevatus. 1324.

133. Frater Corradus Nuccii. Ultra quam scribi possit valde devotus, ob quam causam Ierusolimam transf<r>etavit et in loco Yesu Christi sacrosancti sepulcri mansit clausus pluribus annis. Post omnia devote completa, ad supernam Ierusalem sursum est et libera liberimus evolavit.

134. Frater Iohannes de Sancta Viviana, conversus. Sollicitus fuit valde; et precipue infirmis ylariter serviebat, cibos parabat et humaniter porrigebat. Quare immensa dona nactus, in mensa Domini saturatur.

135. Frater Raynerius, conversus, de Sancto Sixto. Calcifex expertus, pro conventu procurator importunus, custos rerum minime sopnolentus, multum religiosus et carus. Antiquus obiit sed spiritu inrevocabiliter iuvenescit.

136. Frater Laurentius Sardus.

137. |19r| Frater Iacobus Donati. Huius opera ipsum usque ad astra extollunt. Licteratus magnus utpote qui studuit in primis scientiis et exinde in theologia Parisius, unde rediens fuit multotiens lector in Pisis et Perusio. Religiosus plurimum, predicator excellens, pluries prior nostri conventus, omnibus principibus et populis gratiosus. Unde illustrissimus rex Robertus, contra pisanos odio et furore turbulentus, placari eis non potuit nisi verbis istius dulcissimis et sapientissimis primo receptis; nam pisanorum ad ipsum regem ambaxiator directus et missus, ita eumdem ad concordiam inclinavit ut ipso volente cives legati ad ipsum pacem firmissimam impetrarunt. A quo rege eum secum pro consiliario nitente tenere repudiavit,  potius in humilitate vivere quam in fastidioso fastigio seculi remanere. Predicator fuit generalis et pluries diffinitor provincialis capituli. Ita mentes civium cuiuscumque conditionis sua prudentia et solertia tenebat inclusas, ut quidquid petebat, sive in comuni sive in particulari, indefectibiliter obtinebat. Ipse enim de pecunia procurata ecclesie Sancte Katerine faciem, opus marmoreum admirandum, incepit atque complevit. Iste fuit qui dimisit conventui aniversaria non parva nec pauca. De istius etiam pecunia latus claustri quod est ex parte hospitii et infirmitorii veteris, fuit laudabili sculptura perfectum.  Habuit etiam libraria nostra comunis de suis librorum volumina multa. Quapropter est de patribus precipuis nostri conventus tenaci memoria recolendus. Licet ob hec et alia quae scribi non possunt, letetur in eternum celestibus armoniis. 1327 septembris.

138. Frater Fredericus de Sancto Paulo ad Ortum. Iuvenis verecundus et bonus, mundus corpore et mente, devotus dyaconus, in ortis irriguis celestis patrie delectatur.

139. |19v| Frater Oddo de Sala. Familia fuit populi de nostre senioribus civitatis; habitatio eorum fuit ubi nunc est Anthianorum platea. Hic fuit clericus omnimodo completus. Primo in corpore, de pulcrioribus et magis formosis hominibus cuiuscumque status, qui suo tempore sunt inventi. Deinde magni consilii, literatus et Parisius studens et lector pis(anus) et predicator acceptus, sensatus et prior pis(anus). Quem, ut meis auribus ego percepi a domino Raynerio Damiani consultissimo viro, <exces>sisse in prudentia clericos universos. Habuitque plurimas dignitates: fuit 1° episcopus terralbensis [1300-02], 2° polensis [1302-08], 3° archiepiscopus arborensis [1308-12], 4° archiepiscopus pisanus [1312-23], 5° patriarcha alexandrinus [1323-25]. Postea omnibus eclesiis audacissime et virilissime gubernatis, sui laboris premium accepit felicitatis eterne de mense may 1324.

140. Frater Robertus del Drago. Fuerunt cives antiqui. Hic fuit homo mirabiliter virtuosus, et exemplaris religiosus. Fuit espicopus usellensis [= Ales, pr. Aristano, 1312?], et multa dimisit conventui bona, inter alia pictantiam in cena Domini ad quam invitantur illi del Tignoso de Sancto Martino quia fuerunt consanguinei sui. Iacet eius venerabile corpus in ecclesia nostra coram altari maiori, cuius spiritus cum celestibus iocundatur.

141. Frater Orlandus de Soana. Persona valoris in ordine sed postea factus est episcopus doliensis. Bene se gessit. Tandem suaviter vocatus e corpore non cessat divina fruitione repleri.

Omnes isti episcopi defuncti sunt 1320, sed hic sunt positi oblivione scribentium. Credo enim, et ita comperi, quod multi fratres fuerunt qui ab isto libello antiquitus neglecti fuerunt.

142. |20r| Frater Bartholomeus de Cantone. Fuerunt cives satis antiqui, de quibus aliquos ego vidi. Fuit vir quorum merita invitant ipsum laudibus non parvis efferre. Fuit enim religiose valde conversationis et grate, magne scientie et multe peritie. Propter que, officia prelationis obtinuit. Prior pisani conventus, ubi rexit provide valde; lector etiam conventus nostri famosus. Iste incepit componere nostri claustri pisani marmorei admirandum omnibus opus, et ecclesiam et refectorium monasterii Sancte Crucis. Tandem vite cursu laudabiliter consumato, eternitate interminabili requiescit. 1328 otumber [sic].

143. Frater Henricus de Balneo, qui fuerunt mercatores magni et cives antiqui in capite vici maioris. Hic valde devotus et prudens atque discretus, de quo multa magnalia sperabantur, ut michi quidam narravit frater antiqus. Novitius relicto cadenti seculo meruit habitacula celi.

144. Frater Guido de Fraxis, in Sancto Paulo ad Ortum, antiquissimi cives. Hic fuit utilis et exemplaris omnibus valde. Fuit supprior pis(anus); tunc enim temporis erat supprioratus officium fratrum venerabilium, non ut modo. Et diebus non paucis in religione bene consumptis, gaudet cum Christo in secula sempiterna.

145. Frater Uguiccio de Ucellis. Fuit in Pisis de antiquis, honesta valde familia, germanus sororis Katerine de Ucellis, quam senio ego vidi confectam; etiam supprior pis(anus). Fuit omni ex parte probatus et bonus. Tandem dimissa gravi carne ad celorum alta volavit.